入場,唔入場,是一個問題

03
最近有好多人都開始講「喂,做乜少左人入場嘅?」,當呢個話題再次拎出嚟講嘅時候,病情都可以話幾嚴重,如果唔係又點會有人講。作為球迷嘅,當然睇到有啲咩問題,咁就即管寫少少比大家傾下諗下啦。

比賽質素

未命名-245有人問,有啲戲碼都唔錯丫,點解都冇二千人嘅呢?我就覺得而家就算頭四對碰,都唔見得有咩可觀性,幾隊打法又差不多,衰啲講句,未開波已經大約估到場波會點走法。唔似得好似外國咁,弱隊都有自己一套,未落場都未知誰勝誰負,未打過都唔知會打成點。

香港球迷胃口大,呢個係不能改變嘅事實,冇幾多人入場只係為左支持某隊波,比得錢入場嘅都想睇返場好波。但係球隊打法又咁上近,踢法精彩嘅球員又冇乜,90分鐘都未必可以令你「嘩!」一次嘅波,又點會過癮。一次唔過癮,兩次唔過癮,想再入場嘅心係會熄火架。

而家入場要八草野,你揀人,人揀你,港超有咩優勝之處令人非揀你不可先。入場要時間同金錢,時間同金錢背後係大半日嘅假期,對於香港奴工黎講,係一個好大嘅成本黎架。未開波都估到係一場咩波嘅時候,去紅磡睇場估唔到嘅戲,唔係仲好咩,找返嗰廿蚊仲可以去時新食漢堡包添。

波總

百年港甲變港超,季前記招係威係勢,新logo新贊助,的確係有耳目一新嘅感覺嘅,至少唔打得都睇得丫嘛。但係之後呢,都可以話無以為繼。我知我知,有啲嘢唔易做,但巴士廣告、地鐵廣告對我哋呢啲舊客仔有咩咁吸引?對啲街外人黎講,一個球員同一個球迷嘅一張合照,會唔會令佢哋覺得港超呢個商品係吸引嘅呢?

我哋做球迷嘅都知做宣傳嘅都困難重重,有心都未必有咁多隻手,我哋明白亦體諒,有啲長訪問就搵啱人去做,啲故仔都幾好睇。不過問題就確實一直係到,駛咗錢,唔見得有效果,其實波總係咪要檢討下,短期性工作不見成果呢個問題呢?不過又咁講,作為一個官方機構,足總好似又冇乜義務幫各支球隊炒旺個場,炒熱埋你隊波。

話題性

01咁問題又會落返係球隊身上,老老實實,你哋自己RUN一盤生意都唔盡力,都唔想件事好嘅,咁又怪得邊個?

有啲一開波就要乜化物化,而家我就話你都唔化,唔識就坐低啦,搞個facebook Page都一穫粥咁,球迷最感受到嘅就係你班人唔識中文,就係咁多。又有一啲就仲未知自己想點,未認識香港球市嘅生態。又有一啲不停做不停做,但係啲嘢真係要特別的審美眼光先掂。有啲就最好乜都唔駛錢,一定有回報先做。又有一啲根本就停留係幾廿年前,完全唔介意冇球迷,不過又會鬧冇人入場架啵,最好就唔駛做都紅旗,咁就真係投資有道。

成個聯賽有九隊,得一兩隊係真係知道方法,知道點樣去拍響隻手,啲嘢拎得上枱唔會失禮鄉里嘅。其他連日常運作,保持網絡曝光率同吸引度都做唔好,咁樣嘅情況下,點可能有足夠嘅話題放落成個頂級聯賽,去做到話題性營銷?波已經唔係好睇,球會又唔識或者唔想方法「了」啲話題出嚟,比D意義場波,冇話題嘅嘢又點引到人比錢。其實係看台放幾個女仔係到做所謂打氣嗰啲,唔係話題黎囉唔該,而且好老土好阿叔囉。

咁多問題加加埋埋,留唔住個五千人基本盤,係合情合理。仲有一樣,你哋想食老本冇問題,但有冇用心照顧過一班老球迷,你知唔知佢地已經好少可可以好似以前咁坐埋一齊,高高興興咁過返個週末。而且老本係會食完,有啲老球迷都陸續仙游,游咗去就唔駛買飛都入到場架喇。其實仲有好多好多,講漏嘅就留俾咁多位講下喇!

文: 種樹軍

廣告

發表迴響

在下方填入你的資料或按右方圖示以社群網站登入:

WordPress.com 標誌

您的留言將使用 WordPress.com 帳號。 登出 /  變更 )

Google+ photo

您的留言將使用 Google+ 帳號。 登出 /  變更 )

Twitter picture

您的留言將使用 Twitter 帳號。 登出 /  變更 )

Facebook照片

您的留言將使用 Facebook 帳號。 登出 /  變更 )

連結到 %s